پشاور (نیوزڈیسک) خیبرپختونخوا میں بلدیاتی انتخابات کے دوران دھاندلی کے خلاف سیاسی جماعتوں نے احتجاج کرتے ہوئے کہا ہے کہ تحریک انصاف نے بلدیاتی انتخابات میں دھاندلی کے تمام ریکارڈ توڑ دیئے۔ بدھ کو خیبرپختونخوا میں بلدیاتی انتخابات کے پانچویں روز بھی عوامی نیشنل پارٹی اور جمعیت علماءاسلام کے کارکنوں نے بلدیاتی انتخابات کے دوران مبینہ دھاندلی کے خلاف احتجاج کیا، جس میں مظاہرین نے کہا کہ تحریک انصاف کی حکومت نے خیبرپختونخوا کے بلدیاتی انتخابات میں دھاندلی کے سب ریکارڈ توڑ دیئے ہیں۔ مظاہرین نے احتجاج کرتے ہوئے وزیر اعلیٰ ہاﺅس کی جانب بڑھنے کی کوشش کی لیکن سیکیورٹی اہلکاروں نے انہیں آگے بڑھنے سے روک دیا۔