کراچی (نیوزڈیسک)آئی جی جیل خانہ جات سندھ نے قیدیوں کو چھڑانے کےلیے جیلوں پر دہشت گردوں کے حملے کا خدشہ ظاہر کیا ہے۔آئی جی جیل خانہ جات نصرت منگن کی جانب سے صوبے بھر کے جیلوں کے ڈی آئی جیز کو خط بھیجا گیا ہے جس میں جیلوں پر دہشت گردوں کے حملوں کے خدشے سے آگاہ کیا گیاہے۔ آئی جی جیل کے خط میں کہا گیا ہےکہ کرائم مانیٹرنگ سیل نے دہشت گردوں کے منصوبوں سے آگاہ کیا ہے جس کے مطابق خطرناک قیدیوں کو چھڑانے کے لیے جیلوں پر حملہ ہوسکتا ہے۔خط میں مزید کہا گیا ہے کہ سنٹرل جیل کراچی سے عدالت لائے گئے قیدیوں کو چھڑانے کے لیے بھی حملے کا خدشہ ہے جب کہ حیدرآباد جیل سے بھی قیدیوں کی عدالت متقلی کے دوران حملہ کیا جاسکتا ہے۔ آئی جی جیل خانہ جات کے خط کے بعد کراچی اور حیدرآباد سنٹرل جیلوں سمیت صوبے بھر کی جیلوں کی سکیورٹی مزید سخت کردی گئی ہے