کراچی(نیوزڈیسک)نجی ٹی وی نے دعویٰ کیا ہے کہ متعدد کیسز میں پھنسے پیپلزپارٹی کے باغی رہنما اور سندھ کے سابق وزیر داخلہ ڈاکٹر ذوالفقار مرزا جلد پاکستان چھوڑ دیں گے۔نجی ٹی وی کے مطابق ڈاکٹر ذوالفقار مرزا اپنی اہلیہ فہمیدہ مرزا کے ساتھ کسی بھی وقت امریکا چلے جائیں گے۔ گزشتہ جمعرات کو امریکی قونصلیٹ میں سابق صوبائی وزیر داخلہ کا انٹرویو تھا جہاں امریکا کے لئے ان کے ویزے سے متعلق تمام چیزیں تقریباً مکمل ہو چکی ہیں اور جلد ہی وہ اپنی اہلیہ کے ہمراہ پاکستان سے چلے جائیں گے۔واضح رہے کہ سابق صوبائی وزیر داخلہ سندھ پی پی کے شریک چیئرمین آصف علی زرداری اور ان کی بہن فریال تالپر پر بڑے پیمانے پر کرپشن اور قتل جیسے جرائم کے الزامات عائد کررہے ہیں، مرزا کے تابڑ توڑ حملوں کے بعد ان کے خلاف سات سے زائد مقدمات درج کیے جاچکے ہیں۔