لاہور ( نیوزڈیسک) لاہور ہائیکورٹ نے ممبئی حملہ کیس کے مبینہ مرکزی ملزم ذکی الرحمن لکھوی کی نظر بندی کے خلاف دائر درخواست غیر موثر قرار دیتے ہوئے نمٹا دی۔ گزشتہ روز جسٹس سردار طارق مسعود نے کیس کی سماعت کی۔ذکی الرحمن لکھوی کے وکیل نے عدالت کے روبرو موقف اختیار کیا کہ عدالت کے حکم کے باوجود ذکی الرحمن لکھوی کو نظر بند رکھا جانا توہین عدالت ہے۔ لہٰذا نظر بندی کو کالعدم قرار دے۔سرکاری وکیل نے عدالت کو آگاہ کیا کہ عدالتی حکم پر عمل کرتے ہوئے ذکی الرحمن لکھوی کی نظر بندی ختم کر کے انہیں رہا کر دیا گیا ہے۔ عدالت نے دلائل سننے کے بعد درخواست غیر موثر قرار دیتے ہوئے نمٹا دی