اسلام آباد(نیوز ڈیسک) وزارت پانی و بجلی نے ڈیزل پر جنرل سیلز ٹیکس کم کرنے کی سفارش کر دی۔
وزارت پانی و بجلی کے ذرائع کے مطابق بجلی پیدا کرنے والی کمپنیوں جو ڈیزل سے بجلی پیدا کرتی ہیں ، وہ ڈیزل پر 32 فیصد سیلز ٹیکس ادا کرتی ہیں جبکہ انہیں ریفنڈ کی صورت میں 17 فیصد واپس ملتے ہیں جس کی وجہ سے ڈیزل سے بجلی پیدا کرنے والی کمپنیوں کو روزانہ ایک کروڑ سے زیادہ کا نقصان اٹھانا پڑتا ہے جبکہ ایف بی آر نے فرنس آئل کے علاوہ دیگر تمام پٹرولیم مصنوعات پر مزید پانچ فیصد ڈیوٹی عائد کر دی ہے ، سیلز ٹیکس کی کمی سے بجلی کی قیمتیں کم ہوں گی۔ ذرائع کے مطابق سیلز ٹیکس ایکٹ کے مطابق بجلی پیدا کرنے والی کمپنیوں کو 17 فیصد سیلز ٹیکس ادا کرنے کا پابند بنایا گیا جبکہ دوسری جانب حکومت نے ڈیزل پر جنوری میں 5 فیصد فروری میں 5 فیصد جبکہ مارچ میں 10 فیصد سیلز ٹیکس میں اضافہ کر دیا جس کے بعد بجلی پیدا کرنے والی کمپنیوں کے اربوں روپے ایف بی آر کے پاس ریفنڈ کی مد میں رک گئے۔