اسلام آباد (نیوز ڈیسک) پارلیمنٹ کے دونوں ایوانوں کا مشترکہ اجلاس کل پیر کو سپیکر قومی اسمبلی سردار ایاز صادق کی زیر صدارت پارلیمنٹ ہاﺅس اسلام آباد میں ہو گا اجلاس میں یمن کی صورت حال پر بحث اور پاکستان کی طرف سے سعودی عرب فوج بھجوانے سے متعلق ایوان کو اعتماد میں لیا جائے گا جبکہ اجلاس میں وزیر اعظم میاں محمد نواز شریف مشرقی وسطی کی صورت حال اور اس میں پاکستان کے کردار کے حوالے سے دونوں ایوانوں کے ارکان کو اعتماد میں لیں گے ۔ واضح رہے کہ وزیر اعظم میاں نواز شریف کی ایڈوائس پر صدرمملکت ممنون حسین نے دونوں ایوانوں کا مشترکہ اجلاس کل پیر کو طلب کیا ہے ۔