اسلام آباد (نیوز ڈیسک )سری لنکا کے صدر میتھری پالا سری سیناپاکستان کے تین روزہ دورے پر کل اتوار کو اسلام آباد پہنچ رہے ہیں۔نئے منتخب صدر سری سینا کا پاکستان کا یہ پہلا دورہ ہوگا۔پاکستان میں قیام کے دوران وہ صدر ممنون حسین اور وزیراعظم محمد نوازشریف سے متعدد معاملات پر بات چیت کرینگے۔ان کے دورے کے موقع پر دونوں ملکوں کے درمیان مختلف شعبوں میں تعاون کے متعدد معاہدوں اورمفاہمت کی یاداشتوں پردستخط کئے جائیںگے۔پاکستان اور سری لنکا کے درمیان خوشگوار دوستانہ تعلقات قائم ہیں۔دونوں ممالک کے درمیان سفارتی تعلقات 1948ءمیں قائم ہوئے تھے جس کے بعد دوطرفہ تعلقات مضبوط سے مضبوط تر ہوتے چلے گئے۔سارک اور دولت مشترکہ کے رکن ممالک ہونے کی حیثیت سے پاکستان اور سری لنکا دوطرفہ علاقائی اور عالمی نوعیت کے معاملات پرایک دوسرے سے قریبی تعاون کرتے ہیں۔