اسلام آباد (نیوزڈ یسک ) امریکا کے محکمہ خارجہ کے قونصلر امور ڈویژن نے ایران میں موجود اپنے شہریوں کے لیے تازہ سفری ایڈوائزری جاری کرتے ہوئے

انہیں جلد از جلد ملک چھوڑنے کا مشورہ دیا ہے۔سرکاری بیان میں بتایا گیا کہ یہ ہدایت سوشل میڈیا اور آفیشل ویب سائٹ کے ذریعے جاری کی گئی، جس میں ایران کی موجودہ سکیورٹی صورتحال کے پیش نظر امریکی شہریوں کو خبردار کیا گیا ہے کہ وہ مزید تاخیر کیے بغیر وہاں سے نکل جائیں۔بیان کے مطابق 21 اپریل تک ایران کی فضائی حدود جزوی طور پر بحال ہو چکی ہے، جس کے باعث محدود پیمانے پر پروازوں کا سلسلہ دوبارہ شروع ہو گیا ہے۔

امریکی حکام نے شہریوں کو ہدایت دی ہے کہ وہ اس موقع سے فائدہ اٹھاتے ہوئے دستیاب پروازوں کے ذریعے فوری روانگی کو یقینی بنائیں۔محکمہ خارجہ کا کہنا ہے کہ خطے میں حالات غیر یقینی ہیں، اس لیے احتیاطی تدابیر کے طور پر انخلا کی یہ ہدایت جاری کی گئی ہے۔مزید کہا گیا کہ شہری اپنے سفری انتظامات خود مکمل کریں اور تازہ ترین معلومات کے لیے سرکاری ذرائع سے مسلسل رابطے میں رہیں۔حکام نے ایک بار پھر زور دیا ہے کہ ایران میں موجود تمام امریکی شہری ممکنہ خطرات سے بچنے کے لیے فوری طور پر ملک چھوڑ دیں۔