اسلام آباد (نیوز ڈیسک)امریکا نے خطے میں بڑھتی ہوئی سیکیورٹی صورتحال کے پیشِ نظر اپنے شہریوں کو ہدایت جاری کی ہے کہ وہ مشرقِ وسطیٰ کے متعدد ممالک فوری طور پر چھوڑ دیں۔

امریکی اسٹیٹ ڈپارٹمنٹ کی تازہ ایڈوائزری میں کہا گیا ہے کہ بحرین، مصر، ایران، عراق، اسرائیل (بشمول مغربی کنارہ اور غزہ)، اردن، کویت، لبنان، عمان، قطر، سعودی عرب، شام، متحدہ عرب امارات اور یمن میں موجود امریکی شہری سیکیورٹی خدشات کے باعث اپنی مدد آپ کے تحت جلد از جلد ان ممالک سے روانہ ہو جائیں۔دوسری جانب کینیڈا نے بھی اپنے شہریوں کو خبردار کرتے ہوئے دبئی سے فوری انخلا کی ہدایت دی ہے۔

کینیڈین حکام کا کہنا ہے کہ خصوصی پروازوں کے انتظام کا انتظار نہ کیا جائے بلکہ متبادل راستے اختیار کرتے ہوئے زمینی راستے سے سعودی عرب یا سلطنت عمان کا رخ کیا جائے۔کینیڈین حکومت نے مزید خبردار کیا ہے کہ کسی بھی وقت میزائل یا ڈرون حملوں کا خطرہ موجود ہے اور سیکیورٹی کی صورتحال اچانک مزید خراب ہو سکتی ہے۔ شہریوں کو مشورہ دیا گیا ہے کہ وہ فوجی تنصیبات اور دیگر حساس مقامات سے دور رہیں اور احتیاطی تدابیر اختیار کریں۔