اسلام آباد (نیوز ڈیسک) پاکستان کے خفیہ اداروں نے بھارت کی جانب سے ایک اور دہشت گرد منصوبہ ناکام بنا دیا، جس کے بعد بھارت کو ایک بار پھر عالمی سطح پر سبکی کا سامنا کرنا پڑا۔وفاقی وزرا عطا محمد تارڑ اور طلال چوہدری نے اسلام آباد میں مشترکہ پریس کانفرنس کرتے ہوئے بھارتی سازش سے متعلق تفصیلات جاری کیں اور بھارت کے لیے جاسوسی کرنے والے گرفتار ملزم اعجاز ملاح کا اعترافی ویڈیو بیان بھی میڈیا کے سامنے پیش کیا۔وزیرِ اطلاعات عطا تارڑ نے بتایا کہ **’’آپریشن سندور‘‘ کی ناکامی کے بعد بھارت نے پاکستان کے خلاف جھوٹے پروپیگنڈے اور خفیہ کارروائیوں کا سلسلہ تیز کیا۔
اسی سلسلے میں بھارتی خفیہ اداروں نے پاکستانی ملاح اعجاز ملاح کو سمندر سے گرفتار کر کے نامعلوم مقام پر منتقل کیا اور دباؤ ڈال کر اسے جاسوسی پر مجبور کیا۔ان کا کہنا تھا کہ بھارتی ایجنسیوں نے اعجاز ملاح کو ہدایت دی کہ وہ پاک فوج، نیوی اور رینجرز کی وردیاں، موبائل سم کارڈز اور دیگر سامان حاصل کرے۔ تاہم پاکستانی انٹیلیجنس اداروں نے اس کی نقل و حرکت پر بروقت نظر رکھی اور اسے سرحد پار جانے سے قبل ہی گرفتار کر لیا۔
پریس کانفرنس کے دوران دکھائی گئی ویڈیو میں اعجاز ملاح نے اعتراف کیا کہ بھارتی ایجنسیوں نے اسے دھمکی دی کہ اگر وہ ان کے لیے کام نہیں کرے گا تو طویل عرصے تک جیل میں رکھا جائے گا۔ اس نے مزید بتایا کہ اسے مختلف اشیاء پاکستان سے بھارت پہنچانے کا کہا گیا تھا۔وزیرِ اطلاعات نے کہا کہ اس واقعے سے ایک بار پھر واضح ہوگیا کہ بھارت پاکستان کے داخلی معاملات میں مداخلت اور دہشت گردی کے منصوبوں میں ملوث ہے، مگر پاکستانی ادارے ملک کے دفاع اور سلامتی کے لیے پوری طرح چوکس ہیں۔
