اسلام آباد (نیوز ڈیسک) گلگت بلتستان کے ضلع دیامر میں شدید لینڈ سلائیڈنگ کے باعث چلاس سے فیری میڈوز جانے والا راستہ کئی مقامات پر بند ہو گیا، جس کے نتیجے میں سیاحوں کی بڑی تعداد وہاں پھنس گئی ہے۔پولیس حکام کے مطابق فیری میڈوز میں اس وقت مقامی اور غیر مقامی سیاح بڑی تعداد میں موجود ہیں، تاہم چلاس روڈ پر مختلف مقامات پر مٹی کے تودے گرنے کے باعث آمدورفت مکمل طور پر معطل ہے۔ متاثرہ سیاح حکام سے مطالبہ کر رہے ہیں کہ فوری طور پر سڑک کو کھولنے کے لیے اقدامات کیے جائیں۔

پولیس کا کہنا ہے کہ جو نوجوان جسمانی طور پر فٹ ہیں اور پہاڑی راستوں پر چلنے کی صلاحیت رکھتے ہیں، انہیں مخصوص راستے سے گزار کر محفوظ مقام تک پہنچایا جا رہا ہے۔ جبکہ خواتین، عمر رسیدہ افراد اور بزرگوں کو پاک فوج کے ہیلی کاپٹروں کے ذریعے ریسکیو کیا جا رہا ہے۔حکام کے مطابق لینڈ سلائیڈنگ اور حالیہ سیلابی صورتحال کے باعث فیری میڈوز میں موجود تقریباً 200 بکریاں بھی ہلاک ہو چکی ہیں، جس سے مقامی چرواہوں کو شدید نقصان پہنچا ہے۔ریسکیو ٹیمیں علاقے میں موجود ہیں اور سڑک کی بحالی کے لیے کام جاری ہے، تاہم خراب موسم اور دشوار گزار پہاڑی راستے امدادی کارروائیوں میں رکاوٹ پیدا کر رہے ہیں۔