اسلام آباد (نیوز ڈیسک) وزیر دفاع خواجہ آصف نے بھارت کو سخت خبردار کرتے ہوئے کہا ہے کہ اگر بھارت نے جنگ کے دائرے کو وسیع کیا تو صورت حال ایٹمی تصادم تک جا سکتی ہے۔

جیونیوز سے بات کرتے ہوئے خواجہ آصف نے واضح کیا کہ اگر خطے میں ایٹمی جنگ چھڑتی ہے تو اس کی تمام تر ذمہ داری بھارت پر عائد ہوگی۔

یاد رہے کہ گزشتہ رات بھارتی فورسز نے اندھیرے کا فائدہ اٹھاتے ہوئے آزاد کشمیر اور پاکستان کے کچھ علاقوں پر حملے کیے۔ ان حملوں کے جواب میں پاکستان نے مؤثر کارروائی کرتے ہوئے بھارتی فضائیہ کے پانچ جنگی طیارے تباہ کر دیے اور ایک اہم بریگیڈ ہیڈ کوارٹر کو بھی نشانہ بنایا۔ پاکستانی افواج نے دشمن کی متعدد چیک پوسٹیں بھی تباہ کیں، جن کی ویڈیوز ڈی جی آئی ایس پی آر کی جانب سے میڈیا کو فراہم کی گئیں۔

ادھر آج منعقد ہونے والے قومی سلامتی کمیٹی کے اجلاس میں پاک فوج کو دشمن کی جارحیت کا سخت جواب دینے کا مکمل اختیار دے دیا گیا۔

سرکاری اعلامیہ کے مطابق، اقوام متحدہ کے چارٹر کے آرٹیکل 51 کے تحت پاکستان کو اپنی سرزمین، عوام اور خودمختاری کے تحفظ کے لیے جوابی اقدام کا حق حاصل ہے۔ پاکستان کسی بھی وقت، کسی بھی مقام اور کسی بھی طریقے سے بھارتی حملے کا بدلہ لینے میں آزاد ہے۔

اعلامیے میں مزید کہا گیا کہ پاکستان خطے میں امن کا خواہاں ہے، مگر اپنے قومی وقار، علاقائی خودمختاری اور قوم کے تحفظ پر کوئی سودے بازی نہیں کرے گا۔