پشاور (این این آئی)بشریٰ بی بی نے (آج) اتوار کو ہونیوالے پی ٹی آئی احتجاج میں شرکت نہ کرنے کا فیصلہ کیا ہے۔پی ٹی آئی ذرائع کے مطابق بشریٰ بی بی احتجاج میں شرکت کی بجائے وزیراعلیٰ ہاؤس سے احتجاج کی نگرانی کریں گی۔
انہوں نے بتایا کہ ہر حلقے سے اراکین قومی اور صوبائی اسمبلی اور ٹکٹ ہولڈرز قافلے کی نگرانی کریں گے۔ذرائع کے مطابق وزیراعلیٰ خیبر پختونخوا علی امین گنڈا پور صوابی سے قافلے کی قیادت سنبھالیں گے وہ (آج) صبح11 بجے پشاور سے روانہ ہوں گے اور صوابی پہنچیں گے۔دوسری جانب پی ٹی آئی کے ترجمان شیخ وقاص اکرم نے کہا کہ بشریٰ بی بی گھریلو خاتون ہیں، اس لئے احتجاج میں شریک نہیں ہوں گی ،بانی پی ٹی آئی نے بشریٰ بی بی کو سیاسی سرگرمیوں سے دور رہنے کا پیغام بھجوایا تھا۔
