لاہور (این این آئی)ڈریسنگ روم لیکس کی تحقیقات کے معاملے پر کرکٹر محمد رضوان نے پریس کانفرنس کرنے کا عندیہ دیدیا۔

نجی ٹی وی سے گفتگو میں کرکٹر محمد رضوان نے بتایا ہے کہ وہ تحقیقات میں مکمل تعاون کررہے ہیں،تحقیقات مکمل ہونے کا انتظار ہے۔محمد رضوان نے کہا کہ ڈریسنگ روم لیکس کی تحقیقات تحقیقات مکمل ہونے کے بعد وہ نیوز کانفرنس بھی کر سکتے ہیں تاہم انہوں نے این سی سی آئی اے میں پیشی اور کیس پر مزید بات سے گریز کیا۔یاد رہے کہ 10 ستمبر کو قومی کرکٹ ٹیم کے کھلاڑی امام الحق اور محمد رضوان نیشنل سائبر کرائم انویسٹی گیشن ایجنسی میں پیش ہوگئے تھے، جہاں انگلینڈ سیریز کے دوران مبینہ ڈریسنگ روم لیکس اور موبائل فون سے حاصل ہونے والی معلومات سے متعلق دونوں کرکٹرز سے دو گھنٹے پوچھ گچھ کی گئی۔ذرائع کے مطابق دونوں کھلاڑیوں کے فون ان لاک کرنے اورفرانزک کرانے کا تعین کیا جارہا ہے۔

فرانزک کن چیزوں پر ہوگا اسکا تعین کیا جارہا ہے، کھلاڑیوں کے موبائل فون فرانزک میں ایک ہفتہ لگ سکتا ہے۔امام الحق اور محمد رضوان نے نیشنل سائبر کرائم انویسٹی گیشن ایجنسی کو جلد تحریری جواب جمع کرانے کی یقین دہائی کرائی ہے، موبائل فرانزک کے بعد بینک اکاںٹ کی جانچ پڑتال یا دیگر امور نمٹانے کا فیصلہ ہوگا۔ذرائع کے مطابق این سی سی آئی اے نے دونوں کھلاڑیوں سے انگلینڈ میں قیام کے دوران ان کے رابطوں اور ملاقاتوں پر بھی سوالات کیے جبکہ موبائل فونز پر گفتگو اور ڈریسنگ روم کی حساس معلومات لیک ہونے پر بھی پوچھ گچھ کی گئی۔خیال رہے کہ محمد رضوان اور امام الحق ان کرکٹرز میں شامل ہیں جنہیں لارڈز ٹیسٹ کے بعد ٹیم سے ریلیز کر دیا گیا تھا۔ پی سی بی نے کرکٹرز کے موبائل فون متعلقہ اداروں کو بھیج دیے تھے، این سی سی آئی اے کھلاڑیوں کے موبائل فون سے حاصل معلومات کی بنیاد پر تفتیش کر رہا ہے۔