خیر پور(این این آئی) رانی پور میں بااثر پیر اسد شاہ کی حویلی میں تشدد سے کمسن بچی فاطمہ کی ہلاکت کے کیس میں نامزد ملزم اسد شاہ کے جسمانی ریمانڈ میں 3 روز کی توسیع کر دی گئی۔ملزم اسد شاہ کے جسمانی ریمانڈ کی مدت پوری ہونے پر اسے جوڈیشل مجسٹریٹ کی عدالت میں پیش کیا گیا۔

فاطمہ قتل کیس کے تفتیشی افسر نے عدالت کو بتایا کہ اسد شاہ سے جو موبائل فون برآمد ہوئے ان پر سکیورٹی کوڈ لگا ہے، اسد شاہ موبائل فونز پر لگا سکیورٹی کوڈ بتانے کے لیے تیار نہیں ہے، تمام چیزیں شفاف انکوائری پر اثر انداز ہو رہی ہیں۔جج نے ملزم اسد شاہ سے مکالمہ کرتے ہوئے کہا کہ اگر آپ بے قصور ہیں تو موبائل کوڈ پولیس کو بتا دیں۔تفتیشی افسر نے عدالت کو یہ بھی بتایا کہ ملزمان کی ڈی این اے ٹیسٹ کی رپورٹس اب تک موصول نہیں ہوئیں۔

عدالت نے کیس کے مرکزی ملزم اسد شاہ کے جسمانی ریمانڈ میں 3 روز کی توسیع کر دی۔دوسری جانب مقتولہ فاطمہ کے وکیل ایڈووکیٹ نثار احمد بھنبھرو نے میڈیا سے گفتگو کرتے ہوئے کہاکہ تفتیشی افسر نے عدالت کو بتایا ملزم پولیس کے ساتھ تعاون نہیں کر رہا، اقوام متحدہ میں بھی کیس فائل کر دیا گیا ہے۔ایڈووکیٹ نثار احمد بھنبھرو نے کہاکہ یہ ظاہر ہے بچی کی طبی موت نہیں ہوئی، اس کے ساتھ زیادتی ہوتی رہی، سوال یہ ہے کہ جنسی زیادتی کا نشانہ کس نے بنایا، قتل کس نے کیا۔