بٹگرام (این این آئی)خیبر پختونخوا کے شہر بٹگرام میں پاشتو کے مقام پر چیئرلفٹ میں پھنسے ایک بچے کو ریسکیو کرنے کی ویڈیو وائرل ہوگئی ۔چیئرلفٹ میں پھنسے 8 افراد میں سے 2 بچوں کو بحفاظت نکال لیا گیا۔ آخری اطلاعات تک باقی افراد کو ریسکیو کرنے کے لیے پاک فوج کا آپریشن جاری رہا، ریسکیو آپریشن میں پاکستان آرمی کے 4 ہیلی کاپٹر حصہ لے رہے تھے ۔

سوشل میڈیا پر ایک بچے کو ریسکیو کرنیکی ویڈیو سامنے آئی ہے جس میں دیکھا جاسکتا ہے کہ آرمی کا ہیلی کاپٹر چیئر لفٹ میں پھنسے ایک بچے کو ریسکیو کرکے لے جارہا ہے، ایس ایس جی کمانڈو نے ایک بچے کو تھام رکھا ہے۔ اس موقع پر وہاں موجود مقامی لوگوں نے بے اختیار تالیاں بھی بجائیں۔تفصیلات کے مطابق بچے صبح 7 بجے کے وقت چیئرلفٹ کے ذریعے اپنے اسکول جارہے تھے کہ لفٹ کی تین میں سے دو رسیاں ٹوٹنے سے چیئرلفٹ تقریباً سینکڑو ںفٹ کی بلندی پر پھنس گئی۔