لندن(این این آئی)پاکستان مسلم لیگ (ن)کے صدر اور سابق وزیراعظم شہبازشریف نے صدر مملکت ڈاکٹر عارف علوی کے بیان کی شفاف تحقیقات کا مطالبہ کردیا۔تفصیلات کے مطابق سابق وزیراعظم شہباز شریف مسلم لیگ (ن)کے قائد نوازشریف سے ملاقات کیلئے ایون فیلڈ ہائوس پہنچے جہاں انہوںنے میڈیا سے گفتگو کرتے ہوئے کہاکہ صدر نے جو بیان دیا ہے اس کی شفاف تحقیقات ہونی چاہئیں، شفاف تحقیقات کے ذریعے دودھ کا دودھ اور پانی کا پانی ہونا چاہیئے۔
انہوں نے کہا کہ صدر جس بل کو چیک کرتے ہیں اس پر دستخط بھی کرتے ہیں، اس میں زبانی کلامی والی کوئی بات نہیں ہوتی،پاکستان کے سب سے بڑے آئینی عہدے پر بیٹھے شخص کو زبانی کلامی بات نہیں کرنی چاہیئے۔سابق وزیراعظم شہباز شریف نے کہاکہ صدر مملکت صاحب نے اتنے دن انتظار کیوں کیا؟ یہ ایک سوالیہ نشان ہے، بلوں پر دستخط نہ کرنے والا معاملہ اتنا آسان نہیں، اس پر صدر عارف علوی کو جواب دینا پڑے گا۔
