راولپنڈی (این این آئی)سائفر کیس کی سماعت کرنے والی خصوصی عدالت نے 9مئی واقعات سے متعلق راولپنڈی میں مقدمات میں پولیس کو پاکستان تحریک انصاف کے چیئرمین عمران خان اور وائس چیئرمین شاہ محمود قریشی سے تفتیش کی اجازت دے دی۔راولپنڈی پولیس کے افسرسائفر کیس کی سماعت کرنے والی خصوصی عدالت میں پیش ہوئے۔پولیس افسر نے کہا کہ چیئرمین پی ٹی آئی اور شاہ محمود قریشی کو اڈیالہ جیل میں شامل تفتیش کرنا ہے۔

اس پر جج ابوالحسنات ذوالقرنین نے استفسار کیا کہ اس سے قبل چیئرمین پی ٹی آئی اور شاہ محمود قریشی کو شاملِ تفتیش کیاگیا؟پولیس افسر نے کہاکہ دونوں کو شاملِ تفتیش نہیں کیا، شریک ملزمان کے بیانات پرشامل تفتیش کرناہے، ہمارے پاس9 مئی واقعات سے متعلق ایف آئی ایکی رپورٹ بھی موجود ہے۔جج نے عمران خان اور شاہ محمود قریشی کیخلاف درج مقدمات کاجائزہ لیا۔عدالت نے دونوں کو شامل تفتیش کرنے کی اجازت دے دی اور کہا کہ قانون کے مطابق صرف تفتیش کرنے کیلیے اجازت دے رہا ہوں۔خیال رہے کہ عمران خان اور شاہ محمود قریشی سائفر کیس میں ان دنوں اڈیالہ جیل میں قید ہیں۔