اسلام آباد (مانیٹرنگ ڈیسک /)گزشتہ روز ملک بھر کے مختلف شہروں میں سروس کی بحالی کے بعد صارفین کو تاحال سوشل میڈیا سائٹس کے استعمال میں دشواری کا سامنا کرنا پڑ رہا ہے ۔ اس حوالے سے ترجمان پی ٹی اے نے کہا ہے کہ اب تک سوشل میڈیا بحالی کی ہدایات نہیں ملیں۔خیال رہے کہ مسلسل چار روز بند رہنے کے بعد ملک بھر میں انٹر نیٹ سروس بحال کر دی گئی لیکن سوشل میڈیا کی تمام بڑی سائٹس ، یوٹیوب ، فیس بک اور ٹوئٹر سمیت دیگر تاحال بند ہیں۔ صارفین کو ابھی تک سوشل میڈیا کے پلیٹ فارمز تک مکمل رسائی نہیں مل سکی ہے ۔ خیال رہے کہ پاکستان ٹیلی کمیونیکیشن اتھارٹی (پی ٹی اے)کی جانب سے تصدیق کی گئی ہے کہ ملک بھر میں انٹرنیٹ سروس کو بحال کر دیا گیا ہے۔پی ٹی اے کے مطابق وزارت داخلہ کی ہدایت پر ہی تین دن سے انٹرنیٹ سروس بند کی تھی، وزارت داخلہ نے انٹرنیٹ بحالی کی ہدایت کی ہے۔