ژوب/راولپنڈی (این این آئی)بلوچستان کے علاقے ژوب میں خفیہ اطلاعات پر سیکیورٹی فورسز نے آپریشن کیا ہے جس کے دوران فائرنگ کے تبادلے میں ایک دہشت گرد مارا گیا۔پاک فوج کے شعبہ تعلقاتِ عامہ (آئی ایس پی آر) کے مطابق دہشت گردوں سے مقابلے میں
سپاہی حق نواز شہید اور 2 جوان زخمی ہوئے ہیں۔آئی ایس پی آر نے بتایا ہے کہ علاقے کی مسلسل نگرانی کر کے دہشت گردوں کے ایک گروپ کو صبح روکا گیا۔پاک فوج کے شعبہ تعلقات عامہ کے مطابق دہشت گردوں کے فرار کے راستے روکنے کے لیے ناکہ بندی کی گئی تو دہشت گردوں نے فائرنگ کر دی۔آئی ایس پی آر نے بتایا کہ سرحد پار سے دہشت گردوں کے سہولت کاروں کی جانب سے بھی فائرنگ کی گئی۔پاک فوج کے شعبہ تعلقات عامہ کے مطابق علاقے کو دہشت گردوں سے کلیئر کرنے کے لیے آپریشن شروع کر دیا گیا ۔آئی ایس پی آر نے بتایا کہ آپریشن پاک افغان سرحد پر دہشت گردوں کی نقل و حرکت کی اطلاعات پر کیا گیا تھا۔پاک فوج کے شعبہ تعلقات عامہ کے مطابق دہشت گرد خیبر پختون خوا میں داخل ہو کر شہریوں اور سیکیورٹی فورسز کو نشانہ بنانا چاہتے تھے۔
