اسلام آباد(مانیٹرنگ ڈیسک)لاہور کی انسداد دہشت گردی عدالت نے کالعدم جماعت الدعو ةکے سربراہ حافظ محمد سعید کو قید کی سزا سنا دی ،نجی ٹی وی کے مطابق لاہور میں جج ارشد حسین بھٹہ کی عدالت نے سی ٹی ڈی کی طرف سے درج مقدمہ نمبر 16/19 اور 25/19 پر
فیصلہ سناتے ہوئے حافظ سعید سمیت چار افراد کو 2 مقدمات میں قید کی سزائیں سنائیں۔حافظ محمد سعید، پروفیسر ظفر اقبال اور یحییٰ مجاہد کو ساڑھے دس، دس سال کی سزا سنائی جبکہ پروفیسر حافظ عبدالرحمن مکی کو 6 ماہ قید کی سزا سنائی گئی ہے۔اس کے علاوہ حافظ سعید پر ایک لاکھ 10ہزار جرمانہ بھی عائد کیا گیا، جائیداد بھی ضبط کرنے کا حکم جاری کیا گی، یاد رہے پروفیسر حافظ محمد سعید جولائی 2019سے گرفتار ہیں اور ان کیخلاف اب تک چار مقدمات کے فیصلے سنائے جا چکے ہیں۔ جماعت الدعوة کے رہنمائوں کے خلاف سی ٹی ڈی کی طرف سے کل 41 مقدمات درج ہیں جن میں سے 24 مقدمات کے فیصلے ہو چکے ہیں جبکہ باقی اے ٹی سی عدالتوں میں زیرسماعت ہیں۔حافظ سعید کو اس سے قبل رواں سال 12 فروری کو جج ارشد حسین بھٹہ نے ہی دو کیسز میں 11 سال قید اور 30 ہزار روپے جرمانے کی سزا سنائی تھی۔
