لاہور،واشنگٹن( این این آئی)امریکہ کی سیاست اور انتخابی عمل سے کسی بھی طرح کی آگاہی نہ رکھنے کے باوجود پاکستانیوں کی ایک بڑی تعداد نے امریکہ کے صدارتی انتخابات کے نتائج میں غیر معمولی  دلچسپی لی اور اس پر بڑے پیمانے پر جواء بھی کھیلا گیا ۔

تفصیلات کے مطابق چائے کے کھوکھوں اور باربر شاپس سمیت دیگر اکٹھ والے مقامات پر شہریوں کی جانب سے امریکہ کے انتخابات میں صدارتی امیدوار ڈونلڈ ٹرمپ اور جوبائیڈن زیر بحث رہے ۔ شہری جو امریکی سیاست او رحتیٰ کہ ووٹنگ کے طریق کار اورحکومت کی تشکیل کے عمل سے بھی لا علم ہیں وہ اپنے اپنے تبصرے اورتجزیے کرتے ہوئے نظر آئے ۔ اکثریت نے بغیر کسی جواز کے جوبائیڈن کی کامیابی کی خواہش ظاہر کی ۔ دوسری جانب امریکہ میںہونے والے صدارتی انتخابات پر بڑے پیمانے پر بھی جواء بھی کھیلا گیا اور اکثریت نے جوبائیڈن کی کامیابی پر جواء کھیلا ۔دریں اثنا  ڈیمو کریٹ صدارتی امیدوار جو بائیڈن نے کہا ہے کہ نتائج سے سامنے آ رہا ہے کہ ہم جیت رہے ہیں۔ جیت کے لیے پرامید ہوں لیکن ابھی اعلان نہیں کررہا۔غیرملکی خبررساں ادارے کے مطابق ڈلاوئیر میں خطاب میں انہوں نے کہاکہ واضح ہوگیا ہم مطلوبہ الیکٹورل ووٹ حاصل کرلیں گے۔ووٹوں کی گنتی مکمل ہوگی تو ہم جیت جائیں گے۔

انہو ں نے مزید کہا کہ پاپولر ووٹ کا فرق بھی بڑھتا جائے گا، جیت میری نہیں تمام امریکی عوام کی ہو گی۔واضح رہے کہ امریکا میں 59ویں صدارتی انتخابات میں ڈیموکریٹک امیدوار جوبائیڈن اور ری پبلکن صدارتی امیدوار ڈونلڈ ٹرمپ کے درمیان میں کانٹے کا مقابلہ جاری ہے۔ جو بائیڈن کے مجموعی الیکٹورل ووٹ 264 ہو گئے، جبکہ ڈونلڈ ٹرمپ کے الیکٹورل ووٹوں کی تعداد 214 ہے۔