اسلام آباد(مانیٹرنگ ڈیسک)نیب نے سابق وزیر اعظم نوازشریف کی وطن واپسی کے معاملے سے لاتعلقی اختیار کرلی اور موقف اختیار کیا ہے کہ نیب نے نواز شریف کو لندن بھیجا نہیں تو واپس کیوں لائے؟جیو نیوز کے مطابق نیب ذرائع نے کہا ہے کہ نوازشریف وفاقی حکومت کی اجازت سے بیرون ملک گئے تھے اور واپسی کیلئے وزارت داخلہ ہی برطانوی حکومت اور انٹرپول کو خط لکھے۔نیب ذرائع کے مطابق نوازشریف کو عدالتی حکم پر نیب نے نہیں
وفاقی حکومت نے بیرون ملک جانے کی اجازت دی۔ذرائع کے مطابق وفاقی حکومت نوازشریف کو وطن واپس لانے کا فیصلہ کر چکی ہے اور آئندہ ہفتے نواز شریف کی وطن واپسی کے لیے کارروائی کا آغاز کرے گی۔ذرائع کا کہنا ہے کہ نواز شریف کی عدم واپسی کی صورت میں شہباز شریف ان کے ضمانتی بھی ہیں۔گزشتہ روز مشیر احتساب و داخلہ شہزاد اکبر نے بھی کہا تھا کہ شہبازشریف ، نوازشریف کے ضمانتی بنے تھے اس لئے وہ انہیں واپس لائیں ۔
