اسلام آباد(آن لائن)اسلام آباد ہائیکورٹ کے چیف جسٹس اطہرمن اللہ کی عدالت نے فلسطینی سفیر کی گاڑی ضبطگی کیلئے جاری ایف بی آر کا شوکاز نوٹس معطل کرتے ہوئے کلیکٹر کسٹم کوآئندہ سماعت تک فلسطینی سفیر کے خلاف کارروائی سے روک دیا جبکہ سفیر کی گاڑی واپس کرنے کا حکم دے دیا۔گزشتہ روز فلسطینی سفیر احمد جواد ربیئی کی درخواست پر سماعت کے دوران ان کے وکیل سکندر نعیم قاضی نے کہاکہ ایف بی آر نے گاڑی کی فروخت کے حوالے

سے4اگست کو اظہار وجوہ کا نوٹس جاری کیا گیا،سفارتی عملے کو ویانا کنونشن کے تحت خصوصی استثنیٰ حاصل ہے، کسٹم ڈیپارٹمنٹ کا یہ نوٹس سفارتی استثنیٰ کی خلاف ورزی ہے،استدعاہے کہ عدالت حکم دے کہ مجھے اور میری پراپرٹی کو ویانا کنونشن کے تحت استثنیٰ حاصل ہے،عدالت نے مذکورہ بالا اقدامات کے ساتھ سیکرٹری خارجہ، ایف بی آر اور کلیکٹر کسٹم کوجواب کیلئے نوٹس جاری کرکے کیس کی سماعت دو ہفتوں کے لیے ملتوی کردی۔