اسلام آباد (این این آئی)وزیر مملکت علی محمدخان نے سینٹ کوبتایاہے کہ سپریم کورٹ کے فیصلہ کے مطابق پی ایم ڈی سی بحال ہوچکی ،پی ایم ڈی سی پہلے کی طرح کام کر رہی ہے ۔ جمعہ کو وقفہ سوالات کے دور ان وزیرمملکت علی محمد خان نے بتایاکہ سپریم کورٹ کے
فیصلہ کے مطابق پی ایم ڈی سی بحال ہوچکی ہے اور پی ایم ڈی سی پہلے کی طرح کام کر رہی ہے ۔ادویات کی قیمتوں میں حالیہ اضافہ پر ارکان سینیٹ کے حکومت سے کڑے سوالات سامنے آئے ۔ وزیر مملکت نے بتایاکہ ڈرگ پرائسنگ پالیسی ہم نے نہیں نوازشریف حکومت نے بنائی تھی ،ہم نوازشریف دور کی ڈرگ پرائسنگ پالیسی پر ہی عمل کر رہے ہیں ،حکومت نے 360 ادویات کی قیمتیں کم کیں جس پر کمپنیوں نے عدالت سے حکم امتناعی لیا ۔ مشاہد حسین سید نے کہاکہ اس حکومت میں دوائیوں کی قیمتوں کا سکینڈل آیا ، وزیر صحت کو فارغ کیا گیا،دوائیوں کے سکینڈل کی تحقیقات کی کیا صورتحال ہے۔ انہوںنے کہاکہ موجودہ حکومت سی پیک پر بھی نوازشریف کی پالیسی پر عمل کر رہی ہے۔ علی محمد خان نے کہاکہ پاکستان کا غرق شدہ نظام آپ نے ہمارے گلے میں ڈالا ہے،جب بھی کسی وزیر پر سوال اٹھتا ہے کرپشن ثابت ہو نہ ہو وزیراعظم ایکشن لیتے ہیں۔ انہوںنے کہاکہ ماضی میں میڈیا اور دیگر دبائو پر وزراء کو فارغ کیا جاتا تھا۔
