اسلام آباد(سی پی پی )وفاقی وزیر اطلاعات ونشریات فواد چوہدری نے کہا ہے کہ وزیراعظم عمران خان قومی خزانے کی حفاظت کریں گے‘ پارلیمنٹ کی منظوری کے بغیر فنڈز استعمال نہیں ہوں گے‘ سابق حکومت نے 21 ارب روپے کے صوابدیدی فنڈز استعمال کیے۔ ایک نجی ٹی وی چینل سے گفتگو کرتے ہوئے انہوں نے کہا کہ وزیراعظم عمران خان عوام کی دولت کے محافظ ہیں۔

پاکستان تحریک انصاف کی نو منتخب حکومت اور قیادت نے سادگی اختیار کرنے کیلئے اقدامات اٹھائے ہیں اور صوابدیدی فنڈز ختم کردیئے ہیں۔نواز شریف کی گزشتہ حکومت کی کارکردگی پر تبصرہ کرتے ہوئے وزیر اطلاعات نے کہا کہ ماضی کے حکمران صوابدیدی فنڈز بے دردی سے خرچ کرتے رہے۔ انہوں نے کہا کہ سابق حکومت نے 21 ارب روپے کے صوابدیدی فنڈز استعمال کیے‘ نواز شریف جہاں جاتے تھے پیسوں کا اعلان کردیتے تھے‘ نواز شریف اربوں روپے کے فنڈز لٹاتے رہے۔انہوں نے کہا کہ نئے پاکستان میں ایسا نہیں ہوگا۔انہوں نے کہا کہ وزیراعظم عمران خان قومی خزانے کی حفاظت کریں گے‘ پارلیمنٹ کی منظوری کے بغیر فنڈز استعمال نہیں ہوں گے۔فواد چوہدری نے کہا کہ نو منتخب وزیراعظم عمران خان نے سادگی اختیار کرتے ہوئے اپنے جہاز کی بجائے کلب کلاس میں سفر کرنے کا اعلان کیا ہے تاکہ عوام کی دولت کو بچایا جاسکے۔ ایک سوال کے جواب میں وزیراطلاعات نے کہا کہ پی ٹی آئی حکومت پارلیمانی کارروائی اور سیاست کی کوریج کیلئے خصوصی چینل شروع کرے گی۔انہوں نے کہا کہ مسلم لیگ (ن) کا دور ختم ہونے پر عوام نے شکر ادا کیا۔ صدارتی انتخابات کے حوالے سے ایک سوال کے جواب میں وزیر اطلاعات فواد چوہدری نے کہا کہ پاکستان تحریک انصاف کے سینئر رہنما ڈاکٹر عارف علوی آسانی سے صدر مملکت منتخب ہوجائیں گے کیونکہ پی ٹی آئی کے پاس صدر کے انتخاب کیلئے مطلوبہ نمبرز موجود ہیں۔ ایک سوال کے جواب میں انہوں نے امید ظاہر کی کہ وزیر ریلوے شیخ رشید ریلوے کا خسارہ کم کرنے کیلئے اقدامات کریں گے۔

موضوعات:فواد چوہدری