اسلام آباد(مانیٹرنگ ڈیسک)بھارتی فوج کی ایل او سی پر بلا اشتعال فائرنگ، 65سالہ شہری ذوالفقار جاں بحق، پاک فوج کا منہ توڑ جواب، متعدد بھارتی چیک پوسٹیں تباہ۔ آئی ایس پی آر کے مطابق بھارتی فوج کی جانب سے آج ایل او سی کے دانا سیکٹر میں موجی گائوں پر شہری آبادی پر بلا اشتعال فائرنگ کے نتیجے میں 65سالہ شہری ذوالفقار شہید ہو گیا ہے۔

بھارتی فوج کی بلااشتعال فائرنگ کے جواب میں پاک فوج کی جانب سے منہ توڑ جواب دیتے ہوئے بھارتی چیک پوسٹوں کو نشانہ بنایا گیا ہے اور متعدد تباہ کر دی گئی ہیں۔ واضح رہے کہ پاکستان میں آج عمران خان نے 22ویں وزیراعظم کے طور پر حلف اٹھا لیا ہے اور ایسے میں بھارتی فوج کی جانب سے ایل او سی پر بلااشتعال فائرنگ کو بین الاقوامی امور پر نظر رکھنے والے تجزیہ کار بھارت کی جانب سے اچھا پیغام نہیںسمجھ رہے۔ بھارت کی پاکستان کی نئی حکومت کے قیام کے پہلے روز اس قسم کی حرکت کو تجزیہ کار پاکستان کے نئے وزیراعظم عمران خان کیلئے بڑا امتحان قرار دے رہے ہیں۔ واضح رہے کہ پاکستان اور بھارت کے درمیان 2002میں ایل او سی اور ورکنگ بائونڈری پر سیز فائر کا معاہدہ ہوا تھا جس کی بھارت نے متعدد مواقع پر دھجیاں بکھیرتے ہوئے ایل او سی اور ورکنگ بائونڈری پر شہری آبادی کو نشانہ بنانے کا سلسلہ جاری رکھا ہوا ہے۔خیال رہے کہ کچھ دن قبل بھارتی فوج نے آزادکشمیر کے لیپہ سیکٹر میں شہری آبادی کو نشانہ بنایا تھا اور بھارتی بلا اشتعال فائرنگ کے نتیجہ میں علاقہ مکین محصور ہو کر رہ گئے تھے۔ جس کے بعد علاقہ مکینوں نے مظفر آباد میں سول آبادی پر بھارتی بلا اشتعال کے خلاف احتجاجی مظاہرہ کرتے ہوئے اقوام متحدہ کے مبصرین سے اس کا سخت نوٹس لینے کا مطالبہ کیا تھا۔علاقہ مکینوں کا کہنا تھا کہ بھارتی فائرنگ کے نتیجہ میں اس سے قبل ان کو جانی و مالی نقصان اٹھانا پڑا جبکہ ان کی روز مرہ کی زندگی بھی شدید متاثر ہو رہی ہے۔