راولپنڈی(آن لائن) ایون فیلڈ ریفرنس میں سزا یافتہ نوازشریف، بیٹی مریم نوازاورداماد کیپٹن(ر) صفدرنے اڈیالہ جیل میں مصروفیات ڈھونڈ لی ہیں ۔ نوازشریف کو اڈیالہ جیل میں دیکھنے کے لیے ٹی وی، پڑھنے کے لئے ایک اخباراورکام کاج کے لئے ایک مشقتی کی سہولت حاصل ہے، ٹی وی پرصرف سرکاری نشریات دیکھی جاسکتی ہیں۔ نوازشریف جیل کے ماحول میں گھل مل گئے ہیں۔مریم نواز کا دن تلاوت قرآن پاک اوردر ود وظائف کے علاوہ نیلسن منڈیلا پرلکھی مختلف کتابوں کا مطالعہ کرتے گزرتا ہے۔

اس کے علاوہ انہوں نے متعدد خواتین قیدیوں اوران کے بچوں سے دوستی کررکھی ہے۔جیل میں کیپٹن ریٹائرڈ صفدرنے کئی نئے دوست بنا لیے ہیں، وہ جیل میں سارا دن نعتیں پڑھتے رہتے ہیں، جس کی وجہ سے فقیری سوچ کے حوالے سے انہیں جانے جانا لگا ہے۔جیل ذرائع کا کہنا ہے کہ 3 ہفتوں کے دوران نوازشریف نے متعدد مرتبہ اس خواہش کا اظہارکیا کہ تینوں کوایک سیل میں بند کردیا جائے لیکن انہیں آگاہ کیا گیا ہے کہ اس خواہش پرعمل نہیں ہوسکتا۔