راولپنڈی(سی پی پی)اڈیالہ جیل میں قید سابق وزیراعظم نواز شریف کے داماد کیپٹن (ر)صفدر کی طبیعت اچانک خراب ہو گئی۔ کیپٹن صفدر کی طبیعت خراب ہونے پر راولپنڈی ڈسٹرکٹ اسپتال سے ڈاکٹرز کا عملہ اڈیالہ جیل پہنچ گیا۔ اڈیالہ جیل میں ڈاکٹرز کیپٹن(ر)صفدر کا طبی معائنہ کیا۔ کیپٹن (ر)صفدر کی طبیعت سے متعلق ڈاکٹرز کا بیان سامنے نہیں آیا البتہ جیل ذرائع کے مطابق کیپٹن (ر)صفدر کو پیٹ کی تکلیف ہوئی جس کے باعث ان کا طبی معائنہ کرایا گیا۔
دریں اثناء اڈیالہ جیل میں نوازشریف، مریم نواز اور کیپٹن (ر)صفدر سے ان کے وکلا خواجہ حارث اور امجد پرویز نے ملاقات کی جس میں اہم قانونی معاملات پر مشاورت کی گئی۔ملاقات کے بعد میڈیا سے مختصر گفتگو کرتے ہوئے مریم نواز کے وکیل امجد پرویز نے کہا کہ نواز شریف پر عزم اور مضبوط ہیں، وہ سمجھتے ہیں جو سہولیات ملنا چاہئیں تھیں نہیں ملیں۔انہوں نے کہا کہ کیپٹن(ر)صفدر دل کے مریض ہیں اور ان کی میڈیکل رپورٹ بھی ریکارڈ پر ہے۔
