پشاور (مانیٹرنگ ڈیسک) سابق حکمران جماعت (ن) لیگ کے مرکزی رہنما ارباب خضرحیات نے نوازشریف اور مریم نواز کی سزا پر سخت رد عمل کا اظہار کرتے ہوئے ان کی وطن واپسی پرگرفتاری کی صورت میں ازخود گرفتاری دینے کا اعلان کر دیا ۔پشاور میں صحافیوں سے بات چیت کرتے ہوئے ارباب خضرحیات نے کہا کہ مسلم لیگ ن کسی صورت ایک ایسے فیصلے کو ماننے کے لئے تیار نہیں جس سے انصاف و قانون کی نہیں بلکہ انتقام کی بو آ رہی ہو۔

اس فیصلے کے خلاف لیگی کارکن خاموش نہیں بیٹھیں گے بلکہ جیل بھرو تحریک شروع کی جائے گی۔ ہم اپنے قائد کا فیصلہ عوامی عدالت میں لیکر جائیں گے اور انصاف کے حصول کے لئے گلی، کوچوں اور شاہراہوں پر اس فیصلے کے خلاف احتجاج کیا جائے گا۔دنیا کی تاریخ گواہ ہے کہ مقبول عوامی قیادتوں کو متنازعہ عدالتی فیصلوں سے غیرمقبول کرنے کی کوششیں کامیاب نہیں ہوئیں۔واضح رہے کہ مریم نواز اور نوازشریف نے 13 جولائی کو پاکستان واپس آنے کااعلان کررکھا ہے ۔