کراچی (مانیٹرنگ ڈیسک) پاکستان تحریک انصا ف کے چیئرمین عمران خان نے پی ٹی آئی کے پرانے کارکنان اور عہدیداران سے باربی کیو ٹونائٹ ریسٹورینٹ، ڈیفنس کراچی میں ملاقات کی۔ اس موقعے پر چیئرمین عمران خان نے پارٹی کے کارکنان اور عہدیداران سے بات چیت کرتے ہوئے کہا کہ آپ لوگ پاکستان تحریک انصاف کے ساتھ گزشتہ ایک عشرے یا اس سے بھی زائد عرصے سے ہیں۔ آپ اس وقت سے ہمارے ساتھ ہیں جب لوگ ہمارا مذاق اُڑایا کرتے تھے۔
لوگ کہتے تھے کہ عمران خان صرف ایک کرکٹر ہے اور کرکٹر کا سیاست میں کیا کام ہوسکتا ہے لیکن آپ کے دیرینہ ساتھ اور رفاقت کی مدد سے ہم وقت کی ہر آزمائش پر پورے اُترے۔ وقت نے ثابت کیا کہ ہمارا اور آپ کا ساتھ بڑی سے بڑی مشکل کا سامنا کرنے کی اہلیت رکھتا ہے۔ آج اگر پاکستان تحریک انصاف کسی مقام پر ہے اور پاکستان میں لوگ جوق در جوق پاکستان تحریک انصاف میں شامل ہو رہے ہیں تو اس میں آپ کی خدمات کو بھی فراموش نہیں کیاجاسکتا۔ میں پارٹی کا چیئرمین ہونے کے ناطے پارٹی کے لیے آپ کی خدمات کو بہت اہمیت دیتا ہوں اور قدر کی نگاہ سے دیکھتاہوں۔ آج ملک کے حالات بدعنوان حکمرانوں کے طفیل بد سے بد تر ہوتے جا رہے ہیں ۔ ایسے میں آپ کی مدد سے پاکستان تحریک انصاف اس رشوت ستانی، اقربا پروری اور بدعنوانی سے بھرپور دور میں عدل و انصاف اور غریب طبقے کی بھلائی کے لیے آواز اُٹھا رہی ہے۔ اس موقعے پر پی ٹی آئی کے کارکنان اور عہدیداران کا جوش و خروش دیدنی تھا۔ انہوں نے مزید کہا کہ ہم چاہتے ہیں کہ ملک میں غربت کا نام و نشان تک نہ ہو اور لوگ اپنا مال و اسباب لے کر ملک کے ایک کونے سے دوسرے کونے تک بے خطر کسی بھی سیکورٹی کے انتظام کا خیال نہ رکھتے ہوئے آجا سکیں۔ پاکستان تحریک انصاف ایک نظرئیے اور سوچ کا نام ہے اور یہ نظریہ اور سوچ آج پاکستان کے ہر شہری کو متاثر کر رہی ہے اور اسے آہستہ آہستہ حق اور سچ کے راستے پر لارہی ہے۔ ہم ملک کو عدل و انصاف سے بھرپور نظام دینا چاہتے ہیں اور خیبر پختونخواہ کی طرح ملک کے ہر صوبے کو بے مثال بنا دینا چاہتے ہیں۔ پاکستان تحریک انصاف پاکستان کو ایک فلاحی ریاست بنانا چاہتی ہے۔
