اسلام آباد(مانیٹرنگ ڈیسک،این این آئی)سینٹ کے الیکشن کے بعد چئیرمین کے انتخاب کے لئے سیاسی جماعتوں میں جوڑ توڑ کا عمل شروع ہو گیا ،آپس میں مشاورت کا عمل بھی جاری ہے۔پاکستان مسلم لیگ ن کی طرف سے راجہ ظفر الحق کو چئیر مین سینٹ بنائے جانے کا امکان ہے۔جب کہ پاکستان پیپلز پارٹی کے چئیر مین آصف علی زرداری بھی اپنا چئیرمین سینیٹ لانے کے لئے سر گرم ہو گئے ہیں۔وہ رضا ربانی کو چئیرمین سینیٹ بنانے کے لئے
متحرک ہو گئے ہیں اور اس مقصد کے لئے پیپلز پارٹی کا ایک وفد بھی کل کوئٹہ پہنچ گیا تھا۔جب کہ پاکستان تحریک انصاف کے رہنما جہانگیر ترین نےبھی آزاد امیدواروں کے ساتھ رابطے شرورع کر دئیے ہیں۔یاد رہے کہ سینیٹ کی 15 نشستوں پرمسلم لیگ (ن) کے حمایت یافتہ امیدوار کامیاب رہے ہیں۔پیپلزپارٹی نے 12 نشستیں اپنے نام کیں۔ 6 نشستیں پی پی ٹی آئی کے حصے میں آئیں۔ نیشنل پارٹی اور جے یو آئی کے 2،2 امیدواروں نے کامیابی حاصل کی۔ ایم کیوایم، جماعت اسلامی اور مسلم لیگ فنکشنل ایک ایک نشست حاصل کر سکیں۔ سینیٹ کی بلوچستان کی 8 نشستوں پرآزادامیدوار کامیاب ہوئے۔ فاٹا کی 4 نشستوں پر فاٹا اتحاد سے تعلق رکھنے والے آزاد امیدواروں نے کامیابی حاصل کی۔ ادھرپاکستان تحریک انصاف نے اپنا وفد بلوچستان بھیجنے کا فیصلہ کیا ہے جو جلد نو منتخب آزاد سینیٹر ز سے ملاقات کریگا ۔ذرائع کے مطابق تحریک انصاف کے رہنما جہانگیر ترین نے سینٹ میں کامیاب ہونے والے آزاد سینیٹر انوار الحق کاکڑ سے ٹیلی فونک رابطہ کیا‘اور انہیں بلوچستان سے کامیاب ہونے والے تمام آزاد سینیٹرز کو مبارکباد دی۔ ترجمان پاکستان تحریک انصاف کے مطابق تحریک انصاف کا وفد جلد بلوچستان سے منتخب آزاد سینیٹرز سے ملاقات کریگا ۔
دریں اثنا پاکستان مسلم لیگ کے (ن)کے صدر کے عہدے کیلئے انتخابات پرسوں منگل ہونگے اس سلسلے میں الیکشن بورڈ تشکیل دیتے ہوئے وفاقی وزیر برائے قانون و انصاف چوہدری محمود بشیر ورک کو چیئر مین الیکشن بورڈ مقرر کردیا گیا۔ میڈیا رپورٹ کے مطابق پاکستان مسلم لیگ ن کے مستقل پارٹی صدر کے انتخاب کے لئے پی ایم ایل این نے الیکشن بورڈ تشکیل دیدیا ہے۔وفاقی وزیر برائے قانون و انصاف چوہدری محمود بشیر ورک
الیکشن بورڈ کے چیئر مین مقرر کر دیے گئے،مسلم لیگ ن کے مستقل پارٹی صدر کے انتخاب کے لئے تشکیل الیکشن بورڈ میں پنجاب سے راجہ اشفاق سرور، سندھ سے شاہ محمد شاہ، خیبرپختوانخوا سے پیر صابر شاہ اور بلوچستان سے سردار یعقوب ناصر بورڈ میں شامل ہیں۔رپورٹ کے مطابق صدر کے عہدے کیلئے منگل کو صبح نو بجے تک کاغذات نامزدگی وصول کئے جائیں گے،کاغذات کی چھان بین مکمل کرنے کے بعد منگل کو ہی صبح دس بجے حتمی فہرست جاری کی جائے گی۔
