اسلام آباد(مانیٹرنگ ڈیسک)پاکستانی عوام کے مفاد میں دہشتگردی کیخلاف جنگ جاری رکھے گا، افغان مہاجرین کی وطن واپسی کے اقدامات تیز کئےجائیں، قومی سلامتی کمیٹی کا اعلامیہ جاری، دوست ممالک کے ساتھ تعلقات کو مستحکم کرنے پر اتفاق۔تفصیلات کے مطابق وزیراعظم شاہد خاقان عباسی کی زیرصدارت قومی سلامتی کمیٹی کا اجلاس اسلام آباد میں ہوا، اجلاس میں تینوں مسلح افواج کے

سربراہان اور وفاقی وزراء نے شرکت کی۔اجلاس میں خطے اور عالمی صورتحال پر بریفنگ بھی دی گئی، اجلاس میں وزیرخارجہ خواجہ آصف نے روس کے دورہ پر بریفنگ دی.خواجہ آصف نے بتایا کہ پاکستان روس باہمی تعلقات میں اضافے کے خواہشمند ہیں، قومی سلامتی کمیٹی کے اجلاس میں خطے کے ملکوں کے ساتھ تعلقات کا جائزہ لیتے ہوئے دوست ممالک کے ساتھ تعلقات کو مستحکم کرنے پر اتفاق کیا گیا.اعلامیہ میں مزید کہا گیا ہے کہ دہشت گردی کی روک تھام کیلئے افغانستان کے ساتھ مسلسل رابطوں کی ضرورت ہے، پاک افغان سرحدپر بارڈر مینجمنٹ سسٹم کا نفاذ اہمیت کا حامل ہے، افغان مہاجرین کی وطن واپسی کے اقدامات تیز کئے جائیں.کمیٹی کو بریفنگ میں بتا یا گیا کہ بھارتی جارحیت کامقصد مقبوضہ کشمیرسے د نیاکی توجہ ہٹانا ہے، اجلاس میں ایل او سی پر بھارتی جارحیت کی مذمت کی گئی۔واضح رہے کہ قومی اسلامتی کمیٹی کے اجلاس کوتجزیہ کار و مبصریں اہمیت کا حامل قرار دے رہےہیں جس کی تین وجوہات ہیں جن میں سے ایک حال میں ہی فنانشل ایکشن ٹاسک فورس کے اجلاس میں  امریکہ ، برطانیہ، فرانس اور جرمنی کی جانب سے پاکستان کو گرے لسٹ میں ڈالنے کا معاملہ ، وزیر خارجہ خواجہ آصف کا حالیہ دورہ روس جبکہ افغان ایشو کے ساتھ ساتھ ایل او سی پر بھارتی جارحیت بتائی جا رہی ہیں۔

موضوعات:قومی سلامتی کمیٹی