لاہور (مانیٹرنگ ڈیسک) پنجاب پولیس نے قصور میں زیادتی کے بعد قتل کی جانے والی زینب سے متعلق کیس میں ملزم عمران کو لاہور کی انسداد دہشت گردی کی عدالت میں پیش کرکے مزید 2روزہ جسمانی ریمانڈ حاصل کرلیا۔گزشتہ روز انسداد دہشت گردی عدالت کے ایڈمن جج سجاد احمد نے زینب قتل کیس کی سماعت کی ۔پولیس ملزم کو سخت سکیورتی حصار اور بکتر بند گاڑی میں عدالت لائی تھی۔پولیس نے عدالت میں موقف اختیار کیا کہ ملزم سے تفتیش باقی ہے، عدالت جسمانی ریمانڈ میں توسیع کرے۔
جس پر عدالت نے ملزم کو مزید دو روزہ جسمانی ریمانڈ پر پولیس کے حوالے کر دیا۔یاد رہے کہ زینب قتل کیس میں پولیس نے اہم پیشرفت کرتے ہوئے مرکزی ملزم عمران کو مزید 7بچیوں کے ریپ اور قتل کیسز میں نامزد کر دیا تھا اور لاہور کی انسداد دہشت گردی کی خصوصی عدالت سے ملزم کا مزید 3روزہ ریمانڈ بھی حاصل کیا تھا۔اس موقع پر تفتیشی افسر نے عدالت کو بتایا تھا کہ ملزم کا ڈی این اے 7دوسرے کیسز سے بھی میچ ہو گیا ہے ملزم عمران نے زینب سمیت 8بچیوں کو اغواء کرکے قتل کیا۔
