اسلام آباد،لاہور(مانیٹرنگ ڈیسک)تحریک انصاف کے رہنما خرم شیر زمان نے کہا ہے کہ کراچی میں جو کچھ بھی ہو رہا ہے وہ کسی صورت بھی قابل قبول نہیں ۔نجی ٹی وی سے گفتگو کرتے ہوئے انہوں نے کہا کہ پاکستان تحریک انصاف نے سندھ اسمبلی میں بھی یہ معاملہ اٹھایا تھا ۔ جن لوگوں کو راؤ انوار نے مارا ہے ہو سکتا ہے کہ وہ دہشتگرد ہوں ، لیکن اگر انہوں نے خود ہی تمام فیصلے کرنےہیں تو عدالتوں کو بند کر دیں۔
جہاں تک یہ بات ہے کہ راؤ انوار مل نہیں رہے تو راؤ انوار وہیں سے ملیں گے جن کے وہ لاڈلے ہیں۔ خرم شیر زمان نے کہا کہ راؤ انوار آصف علی زرداری کے گھر ملیں گے ،اس کے علاوہ کہیں اور نہیں ملیں گے ، ان کی گرفتاری کے لیے بلاول ہاؤس میں چھاپے مارے جائیں۔ کیونکہ انہوں نے ہی راؤ انوار کو تحفظ دیا ہو گا۔ واضح رہے کہ اس سے پہلے متحدہ قومی موومنٹ پاکستان کے سربراہ فارو ق ستار نے بھی کہا تھا کہ سابق ایس ایس پی ملیر راؤ انوار کے زیر زمین جانے کا مقصد یہ ہے کہ کوئی نہ کوئی اس کو پناہ دے رہا ہے۔ فرض کریں اگر عوام کو شک ہے کہ وہ بلاول ہاؤس میں ہے تو ا س کی تلاشی لی جائے۔انہوں نے مزید کہا کہ پہلی ذمہ داری سابق صدر آصف زرداری پرعائدہوتی ہے،ان کی ناک کے نیچے اس کی باربارتعیناتی ہوتی رہی تاہم پیپلزپارٹی کی حکومت مقابلوں کی پالیسی کی وضاحت کرے۔مقابلوں کی آڑمیں جرائم کی دنیااورناجائزدھندے پرورش پاتے ہیں،عوام کی شکایات پر راؤانوار کے کئی مرتبہ تبادلے ہوئے مگروہ پھرآجاتاہے،پہلے قائم علی شاہ اوراب مرادعلی شاہ وزیر اعلیٰ سندھ ہیں۔ مقابلے کرنے والے پولیس اہلکاروں کوسزادی جائے۔عمران خان کوپارلیمنٹ پرلعنت نہیں بھیجنی چاہیے تھی،واضح رہے کہ رائو انوار کا کچھ پتہ نہیں چل رہا کہ وہ کہاں موجود ہیں ۔
