اسلام آباد(این این آئی) سینیٹ کے انتخابات 3 مارچ کو ہوں گے جس کیلئے الیکشن کمیشن نے شیڈول جاری کردیا۔الیکشن کمیشن آف پاکستان کے شیڈول کے مطابق ریٹرننگ آفیسر 3فروری 2018ء کو پبلک نوٹس جاری کریگا جس کے ذریعے امید واران کو کاغذات نامزدگی کے حصول اور جمع کروانے کے بارے میں مطلع کیا جائیگا ٗ کاغذات نامزدگی 4فروری تا 6 فروری متعلقہ ریٹرننگ افسران کے دفاتر میں دفتری اوقات میں جمع کروائے جاسکیں گے۔
کاغذات نامزدگی کی جانچ پڑتال 9 فروری تک مکمل کی جائیگی۔ امیدروان کی فہرست 15 فروری کو جاری کی جائیگی جبکہ کاغذات نامزدگی 16فروری تک واپس لئے جا سکیں گے۔سینیٹ کے انتخابات کیلئے پولنگ 3مارچ2018ء کو ہوگی۔الیکشن کمیشن کے مطابق سندھ اور پنجاب سے 12،12 سینیٹرز، خیبر پختونخوا اور بلوچستان سے 11،11 سینیٹرز کا انتخاب کیا جائیگا ٗاسلام آباد سے ایک جنرل اور ایک ٹیکنوکریٹ کی نشست پر انتخاب ہوگا جبکہ سندھ اور پنجاب سے7 جنرل، 2 ٹیکنوکریٹس، 2 خواتین اور ایک اقلیتی رکن کا انتخاب ہوگا۔الیکشن کمیشن کے مطابق فاٹا سے 4 نشستوں پر انتخاب ہوگا اور چاروں جنرل نشستیں ہیں۔یاد رہے کہ 11 مارچ کو 104 میں سے سینیٹ کے 52 ممبران ریٹائرڈ ہو نگے جن میں پنجاب اور سندھ سے 12،12، خیبرپختونخوا اور بلوچستان سے 11،11 سینیٹرز ریٹائر ہونگے ذرائع نے بتایا کہ پیپلز پارٹی کے 26 ممبران میں سے 18 سینیٹرز، مسلم لیگ (ن) کے 27 میں سے 9 سینیٹرز ریٹائر ہونگے ٗاسلام آباد سے 2 اور فاٹا سے بھی 4 سینیٹرز ریٹائر ہوجائیں گے جبکہ جے یوآئی (ف) کے 5 میں 3 سینیٹرز ریٹائر ہو جائیں گے۔عوامی نیشنل پارٹی کے 6 میں سے 5 سینیٹرز اور تحریک انصاف کا 7 میں سے ایک سینیٹر ریٹائر ہوگا جب کہ مسلم لیگ (ق) کیتمام 4 سینیٹرز ریٹائر ہو جائیں گے۔ذرائع کے مطابق ایم کیوایم کے طاہرمشہدی، نسرین جلیل اور فروغ نسیم بھی ریٹائر ہونے والوں میں شامل ہیں جب کہ اسحاق ڈار، نزہت صادق، کامران مائیکل، ذوالفقارکھوسہ اور نثارمیمن بھی ریٹائر ہوجائیں گے۔
