پشاور ( آن لائن)سینیٹر نسرین جلیل ، سینیٹر شاہی سید اور سینیٹر نثار خان مردان کی عاصمہ قتل کیس میں ہونے والی تفتیش کا جائزہ لینے کیلئے جمعرات کے روز مردان گئے اور اس حوالے سے ہونے والی پیش رفت سے آگاہی حاصل کی۔ اس موقع پر انہوں نے مرحومہ کے والد، چچا اور دوسرے رشتہ داروں سے تعزیت کی اور انہیں یقین دلایا کہ پوری قوم انکے دکھ درد میں برابر کی شریک ہے۔
اس موقع پر ڈپٹی کمشنر مردان ڈاکٹر عمران حامد شیخ، ڈی آئی جی مردان محمد عالم شنواری ، ڈی پی او مردان ڈاکٹر میاں سعید اور دوسرے اعلیٰ افسران بھی اس موقع پر موجود تھے۔ سنیٹر نسرین جلیل نے اس موقع پر باتیں کرتے ہوئے کہا کہ عاصمہ ہم سب کی بچی تھی اور ایسے اندوہناک واقعات کو روکنے کیلئے ہر ممکن اقدام اٹھایا جائیگا۔ انہوں نے کہا کہ انکے مردان کے دورے کا مقصد غمزدہ خاندان سے تعزیت کرنا اور متعلقہ حکام کی اس حوالے سے تفتیش میں ہر ممکن تعاون کرنا ہے۔ انہوں نے مرحومہ کے والد سے استفسار کیا کہ آیا وہ اس حوالے سے ہونے والی تفتیش سے مطمئن ہیں، جس کے جواب میں انہوں نے اطمینان کا اظہار کیا ۔ ڈی آئی جی مردان محمد عالم شنواری اور ڈپٹی کمشنر مردان ڈاکٹر عمران حامد شیخ نے اس مو قع پر باتیں کرتے ہوئے بتایا کہ انٹر نیٹ اور دوسرے ذرائع سے ملنے والی فحش مواد نوجوان نسل کو گمراہ کررہا ہے ، جس کی وجہ سے معاشرے میں عجیب و غریب قسم کے واقعات رونما ہونے لگے ہیں ۔ انہوں نے اس موقع پر تجویز دی کہ وفاقی سطح پر اس حوالے سے اقدامات اٹھانے کی ضرورت ہے۔ سینیٹر شاہی سید نے اسکے جواب میں کہا کہ وہ اس بات کو وفاقی سطح پر اٹھائینگے۔
