اسلام آباد(مانیٹرنگ ڈیسک) زینب  کے ساتھ زیادتی اور قتل کے الزام میں گرفتار ملزم  عمران علی نے اپنے ویڈیو بیان میں لرزہ خیز انکشافات کردئیے۔زینب کے قاتل محمد عمران کی پولیس کو دیے گئے اعترافی بیان کی ویڈیو میں واضح طور پر سنا جا سکتا ہے۔محمد عمران نے اپنے اعترافی ویڈیو بیان میں کہا کہ زینب کو والدین سے ملوانے کا کہہ کر گھر سے ساتھ لے کر گیا، دور ایک لائٹ کو دیکھ کر کہا کہ ہم قریب پہنچ گئے ہیں،

جب ہم وہاں پہنچے تووہاں ایک بندہ کھڑا تھا۔ملزم محمد عمران نے مزید بتایا کہ زینب کو گھماتے گھماتے بہت وقت گزر گیا تو اسے کہا کہ ہم راستہ بھول گئے ہیں، پھر میں نے زینب کو واپسی کا کہا۔ادھرجے آئی ٹی ذرائع کے مطابق ملزم عمران نے دوران تفتیش انکشافات کیے کہ اس نے زینب کو پونے 7 بجے اغوا کیا، مناسب جگہ نہ ملنے پر زینب کو ڈیڑھ کلو میٹر سے زائد ساتھ لے کر گھوما، زیر تعمیر سوسائٹی میں پکڑے جانے کے خوف سے کوڑے کے ڈھیر پر زینب کو لے گیا۔واضح رہے کہ زینب  کا قاتل عمران اس وقت14 روزہ جسمانی ریمانڈ پر پولیس کے حوالے ہے ،لاہور ہائیکورٹ کی جانب سے ایک نوٹیفکیشن جاری کیا گیا ہے جس کے مطابق کیس کی روزانہ کی بنیاد پر سماعت ہوگی۔ادھرزینب کے قاتل عمران کے متعلق انکشاف ہوا ہے کہ اس نے دو شادیاں کر رکھی تھیں ۔ ایک شادی اس نے راولپنڈی کی لڑکی سے کر رکھی تھی جس کو وہ بھگا کر لایا تھاجس کی وجہ سے راولپنڈی میں لڑکی کے اہل خانہ نے اس کے خلاف تھانے میں درخواست دے رکھی تھی جس کی وجہ سے اسے راولپنڈی میں حوالات میں رہنا پڑا۔

موضوعات:زینب قتل کیس عمران علی