لاہور (مانیٹرنگ ڈیسک)صوبائی دارالحکومت  لاہور کی رہائشی بزرگ خاتون سابق نااہل وزیراعظم میاں نوازشریف سے ملنے جاتی امرا پہنچ گئی لیکن کئی گھنٹوں انتظار کے بعد بھی انہیں نواز شریف سے  ملاقات کی اجازت نہ مل سکی۔میڈیا رپورٹس  کے مطابق لاہور کے علاقہ مغلپورہ کی رہائشی بزرگ لیگی خاتون ورکر اماں پٹھانی سابق وزیر

اعظم نوازشریف سے ملنے ان کی رہائشگاہ جاتی امرا پہنچیں تو سیکیورٹی اہلکاروں نے اندر جانے سے روک دیا اور اجازت لینے کا کہا لیکن 4 گھنٹے طویل انتظار کے بعد بھی اجازت نہ ملی۔اماں پٹھانی نے شکوہ کیا کہ میں نے  40 سال مسلم لیگ (ن) کو دیے، مگر آج لیڈر ہی ملنے کو تیار نہیں ہے۔ اماں پٹھانی نے کہا کہ گلی گلی اور گھر گھر جا کر ووٹ مانگنے والے لیڈر جب کارکنوں سے ہی نہیں ملتے تو عوام کی مشکلات کیسے دور کریں گے؟پارٹی سے 40 سالہ رفاقت کا کوئی صلہ نہ ملنے کا شکوہ کرتے ہوئے اماں پٹھانی مایوس لوٹ گئیں۔واضح رہے کہ کسی بھی ممکنہ خطرےکے پیش نظر جاتی امرا کی سکیورٹی انتہائی سخت ہے اور کسی کو بھی قریب بھی پھٹکنے کی اجازت نہیں ہے۔