چکوال (مانیٹرنگ ڈیسک) پاکستان مسلم لیگ (ن)کے صدر ٗسابق وزیراعظم میاں محمد نواز شریف نے کہا ہے کہ حالات جیسے بھی ہوں ٗ اپنے خلاف لگائے گئے تمام الزامات کا آخری حد تک دفاع کرونگا ٗ خیبر سے کراچی تک پوری قوم کومعلوم ہے کہ یہ یکطرفہ احتساب خاص مقاصد کیلئے ہے ٗ ملک کے 21کروڑ عوام کے حقوق اور ان کی بہتری کیلئے ہم اپنا پروگرام جاری رکھیں گے۔ وہ جاتی عمرہ رائے ونڈ میں معروف نعت خوان عبدالرزاق جامی سے گفتگو کررہے تھے جنہوں نے اتوار کی سہ پہر
کو میاں محمد نواز شریف سے ملاقات کی۔ اس موقع پر مریم نواز بھی میاں نواز شریف کے ہمراہ تھیں۔ میاں نواز شریف نے کہا کہ الحمد اللہ ہم نے گزشتہ ساڑھے چار سالوں میں پاکستان کی معیشت کو بحال کردیا ہے۔ ملک سے لوڈ شیڈنگ کے اندھیرے ختم ہو رہے ہیں اور سب سے بڑی بات سی پیک منصوبے نے تمام تر رکاوٹوں کے باوجود ٹیک آف کر لیا ہے ۔ انہوں نے کہا کہ ملک کی ترقی کے دشمن کبھی اپنے منصوبوں میں کامیاب نہیں ہونگے۔ ملک کا مستقبل جمہوریت اور سیاست میں ہے اور آئین کی بالادستی اور بنیادی حقوق کی بحالی کیلئے انشاء اللہ اپنی اننگز بھرپور طریقے سے کھیلوں گا۔
