لاہور (مانیٹرنگ ڈیسک) سابق وزیر اعظم نواز شریف کے پانامہ کیس میں نااہلی کے فیصلے کے خلاف سپریم کورٹ لاہور رجسٹری میں متفرق درخواست دائر کر دی گئی۔درخواست گزار ماہر قانون اے کے ڈوگر کی جانب سے نواز شریف، عمران خان، حسن نواز، حسین نواز، اسحاق ڈار اور نیب کو فریق بناتے ہوئے موقف اختیار کیا گیا ہے کہ وزیراعظم اراکین قومی اسمبلی کے ووٹوں سے منتخب ہوتا ہے ، اراکین قومی اسمبلی ہی بددیانتی کی بنا ء پر آئین کے آرٹیکل 62 ون ایف کے
تحت وزیراعظم کو نااہل قرار دے سکتے ہیں ۔2013 ء میں منتخب ہونے والے وزیراعظم نواز شریف کو کسی عدالت نے بد دیانت نہیں کہا تھا ،ان کو آرٹیکل 184(3) کے تحت اپیل کا حق بھی نہیں دیا گیا جو کہ آرٹیکل 184(3) اسلامی قوانین کے متصادم ہے۔ درخواست گزار نے مزید موقف اپنایا کہ اپیل ہر شخص کا قانونی اور آئینی حق ہے اور نواز شریف کو اپیل کا حق ملنا چاہیے۔ معزز عدالت سے استدعا ہے کہ نواز شریف کی نااہلی کے فیصلے کو کالعدم قرار دیا جائے ۔
