ملتان(آن لائن)سوشل میڈیا سٹار اور معروف ماڈل قندیل بلوچ کے والدین نے کہا ہے کہ قندیل بلوچ قتل کیس میں نامزد ملزم مفتی عبدالقوی کی جانب سے پیسوں کی پیشکش کی گئی ہے ۔ مفتی عبدالقوی کی عدالت پیشی کے موقع پر ملتان کچہری میں میڈیا سے بات چیت کرتے ہوئے انہوں نے کہا کہ مفتی عبدالقوی نے اپنے بندوں کے زریعے 17اور 18 اکتوبر کو پیسوں کی پیشکش کی.قندیل بلوچ کے والد نے کہا کہ میں عدالت سے استدعا کروں گا
کہ عدالت ملزم مفتی عبد القوی کا مزید ریمانڈ دے تاکہ قتل کیس کی مکمل تفتیش ہو سکے اور حقائق سامنے آئیں. انہوں نے کہا کہ مفتی عبدالقوی کے کہنے پر میری بیٹی کو قتل کیا گیا.مفتی عبدالقوی کو سزا دے کر مجھے انصاف دیں.انہوں نے مزید کہا کہ قندیل بلوچ قتل کیس میں ملوث تمام ملزمان کیفر کردار تک پہنچنے چاہیے. بیٹے وسیم کو معاف نہیں کروں گا.قندیل بلوچ کے والد کا کہنا ہے کہ میرا دوسرا بیٹا اسلم شاہین بے گناہ ہے.انہوں نے کہا کہ قندیل بلوچ قتل کیس میں ملوث ملزم عبدالباسط مفتی قوی کا رشتہ دار ہے.اس موقع پر قندیل بلوچ کی والدہ انور بی بی نے میڈیا سے بات کرتے ہوئے کہا کہ مفتی عبدالقوی میری بیٹی کا قاتل ہے کبھی معاف نہیں کروں گی.انہوں نے کہا کہ قندیل بلوچ کا مفتی عبدالقوی سے جگھڑا ہوا تھا جس پر اس نے قندیل بلوچ کو قتل کی دھمکی دی تھی.انہوں نے کہا کہ جھگڑے کے بعد قندیل ملتان آئی تو وہ بہت ڈری ہوئی تھی.اس موقع پر قندیل بلوچ کے والدین نے کہا کہ ہمیں انصاف چاہیے.۔
