گلگت(اے این ا ین)چیئرمین تحریک انصاف عمران خان کی سابق اہلیہ اور سماجی کارکن ریحام خان دیوسائی نیشنل پارک پہنچ گئیں جہاں وہ مقامی لوگوں سے ملاقاتیں کر رہی ہیں ، چھٹیاں منا رہی ہیں۔تفصیلات کے مطابق پی ٹی آئی چیئرمین عمران خان کی سابقہ اہلیہ ریحام خان گزشتہ دنوں شمالی علاقہ جات گئیں ، جہاں وہ دیوسائی
کے لہلہاتے میدانوں اور خوبصورت آبشاروں کے سحر میں گرفتار ہوگئیں، انہوں نے اس دورے کی ایک ویڈیو بھی جاری کی جس میں وہ خود گاڑی ڈرائیو کر رہی ہیں ، ریحام خان کا کہنا تھا کہ دیوسائی یہاں کے خوبصورت پھولوں کی وجہ سے مشہور ہے، یہاں پر پھولوں کی 400سے زائد اقسام پائی جاتی ہیں ، مجھ سے کسی نے وعدہ کیا تھا کہ وہ دیوسائی میں چھٹیاں میرے ساتھ گزارے گا ، مگر اکثر پاکستانی وعدے پورے نہیں ہوتے تو اس لئے میں خود اکیلے میں چھٹیا ں منانے دیوسائی آگئی ہوں۔انہوں نے لڑکیوں کو پیغام دیتے ہوئے کہا کہ لڑکیو! اپنے خواب خود پورے کرو۔ ویڈیو کے دوران ریحام خان نے یہ نہیں بتایا کہ کس نے ان کیساتھ گرمیوں کی چھٹیوں میں دیوسائی کی سیر کا وعدہ کیا تھا۔
