اسلام آباد (مانیٹرنگ ڈیسک) سپریم کورٹ میں شیخ رشید کے خلاف نا اہلی کی درخواست کی سماعت ڈی لسٹ ہوگئی۔نجی ٹی وی کے مطابق عوامی مسلم لیگ کے سربراہ شیخ رشید احمد کے خلاف بینچ کی عدم موجودگی کے باعث سماعت ڈی لسٹ ہوئی ہے۔ یادرہے کہ مسلم لیگ ن کے رہنما شکیل اعوان نے عوامی مسلم لیگ کے سربراہ شیخ رشید پر اثاثے چھپانے کا الزام عائد کرکے سپریم کورٹ سے رجوع کر رکھا ہے ۔

سپریم کورٹ کی جانب سے شیخ رشید نا اہلی کی شکیل اعوان کی درخواست سماعت کیلئے منظور کرتے ہوئے سماعت کیلئے 18 اکتوبر کومقرر کی گئی تھی۔دریں اثنا عوامی مسلم لیگ کے سربراہ شیخ رشید احمد نے کہا ہے کہ (ن)لیگ کا گینگ آف فائیو فوج سے تصادم چاہتا ہے،حالات ٹکرا کی طرف جا رہے ہیں، معیشت کی مزید رسوائی ہونا باقی ہے‘ فوج کو مایوسی کے مزید مواقع ملتے رہیں گے‘ اسحاق ڈار سے بڑا بے شرم نہیں دیکھا‘ نواز شریف قصہ پارینہ بن چکے ہیں چوہدری نثار کو نواز شریف ہی سوٹ کرتے ہیں‘ خدا پاکستان کو نظر بد سے بچائے ‘ پاکستان محفوظ رہے گا اور یہ بدنام اور رسوا ہوں گے۔ اپنے ایک انٹر ویو میں شیخ رشید احمد نے کہا کہ جمہوریت  کو خطرہ کسی اور سے نہیں ہے جمہوریت کو اگر خطرہ ہے تو نواز شریف ان کے خاندان ، احسن اقبال اور ان کے دیگر لوگوں سے ہے۔ انہوں نے کہا کہ ملکی معیشت کی مزید رسوائی ہونا باقی ہے موجودہ حکومت مدت پوری کرتی نظر نہیں آ رہی ہے عدلیہ کے ساتھ نواز لیگ کا تصادم حکومت کا کانٹ ڈاؤن ہے‘ ملک کو10ارب ڈالر کے تجارتی خسارے کا سامنا ہے حکومت نے معیشت کو تباہی کے دہانے پر پہنچا دیا ہے حکومت جھوٹوں کا جمعہ بازار ہے۔ انہوں نے کہا کہ کرپٹ اور چور خاندان نے شرافت کا لبادہ اوڑھ رکھا ہے حدیبیہ پیپر مل کیس کھل گیا تو پورا خاندان عوام کے سامنے آ جائے گا۔ انہوں نے کہا کہ جو مشرف کو چھوڑ کر نواز شریف کے ساتھ جا سکتے ہیں وہ کل نواز شریف کو چھوڑ کر کہیں اور بھی جا سکتے ہیں۔ استعفے پرانی بات ہے میں اب جھاڑو پھیرتے دیکھ رہا ہوں۔ انہوں نے کہا ہے کہ (ن)لیگ کا گینگ آف فائیو فوج سے تصادم چاہتا ہے،حالات ٹکرا کی طرف جا رہے ہیں، معیشت کی مزید رسوائی ہونا باقی ہے‘ فوج کو مایوسی کے مزید مواقع ملتے رہیں گے