اسلام آباد /لاہور ( این این آئی) الیکشن کمیشن آف پاکستان نے آج کی تاریخ تک اپنے مالی سال کے گوشواروں کی تفصیلات جمع کروانے والی چاروں صوبوں سے تعلق رکھنے والی اہم سیاسی شخصیات کی فہرست جاری کر دی ۔الیکشن کمیشن کے مطابق جہانگیر ترین، خورشید شاہ، فریال تالپور، مراد سعید، احمد علی، سید نویدقمر شاہ، مولانا محمد خان شیروانی ، عبد القادر بلوچ، شیریں
مزاری ، مریم اورنگزیب، سید رضا ربانی ، فرحت اللہ بابر، مرتضع جاوید عباسی، سردار محمد یعقوب ناصر، مشاہد حسین سید، پرویز رشید ، راجہ ظفر الحق ، اسحاق ڈار، اکرم خان درانی ، غلام احمد بلور، سراج الحق ، رحمن ملک ، شیری رحمن، فضل الرحمن ، شاہد خاقان عباسی ، چوہدری نثار، عمران خان ، انجینئر خرم دستگیر ، پرویز الٰہی ، زاہد حامد، احسن اقبال، ایاز صادق، خواجہ سعد رفیق اور مخدوم شاہ محمود قریشی نے اپنے مالی گوشواروں کی تفصیلات جمع کروا دی ہیں جبکہ جن بڑے ناموں نے ابھی تک گوشواروں کی تفصیلات الیکشن کمیشن آف پاکستان میں ابھی تک جمع نہیں کروائیں ان شخصیات میں وزیر اعلیٰ پنجاب شہباز شریف ،وزیر اعلیٰ خیبرپختونخواہ پرویز خٹک ،وزیر اعلیٰ بلوچستان ثنااللہ زہری ، خواجہ محمد آصف ، دانیال عریز ، حمزہ شہباز، سردار محمد اویس احمد لغاری ، غلام ربانی کھر، محمد اعجاز الحق ، فہمیدہ مرزا، ڈاکٹر فاروق ستار، عارف علوی، تہمینہ دولتانہ ، عائشہ گلالئی ، کامل علی آغا، اعتراز احسن ، فاروق ایچ نائک، اعظم خان سواتی ، آفتاب احمد شیر پا ، شہریار خان آفریدی، سردار محمد یوسف،کیپٹن (ر) محمد صفدر، اسد عمر ، طارق فضل چوہدری، شیخ رشید ، طلال چوہدری اور عابد شیر علی شامل ہیں ۔
الیکشن کمیشن کے مطابق 15 اکتوبر تک مالی گوشواروں کی تفصیلات نہ جمع کرانے والے پارلیمنٹینیرزکی اسمبلی رکنیت معطل کر دی جائے گی اور ان کے ناموں کو شائع کردیا جائے گا۔ تمام اسمبلیوں کے سکرٹریوں کو خطوط لکھے جائیں گے کہ ان نادھندہ گان کو اسمبلی اجلاس سے روکاجائے اور ان کی تمام مراعات کوبھی معطل کیا جائے۔
