اسلام آباد (مانیٹرنگ ڈیسک) تحریک انصاف کے سابق رہنما و سینئر سیاست دان جاوید ہاشمی نے دعویٰ کرتے ہوئے کہا کہ جماعت اسلامی اور پیپلز پارٹی ختم ہو رہی ہیں، تفصیلات کے مطابق سینئر رہنما جاوید ہاشمی نے ملتان پریس کلب میں میڈیا نمائندوں سے بات چیت کرتے ہوئے کہا کہ جو چاہتا ہے سپریم کورٹ کو اپنے مقاصد کے لیے استعمال کر لیتا ہے، انہوں نے مزید کہا کہ ہمارے ججوں نے آزادانہ فیصلے نہیں دیے، سابق آنجہانی صدر و آرمی چیف جنرل (ر) ضیا الحق نے ججوں کو آرڈر کیا تھا کہ وہ ذوالفقار علی بھٹو کو پھانسی دیں۔ سینئر سیاستدان جاوید ہاشمی

نے مزید کہا کہ جماعت اسلامی اور پیپلز پارٹی آہستہ آہستہ ختم ہو رہی ہیں، دونوں جماعتوں کو زندہ رہنا چاہیے میں ان کو ختم ہوتے ہوئے نہیں دیکھ سکتا، جاوید ہاشمی نے کہا کہ منصوبہ بندی کے تحت مذہبی ووٹ کو الگ کر دیا گیا ہے جب کہ اس سے پہلے یہ ووٹ مسلم لیگ (ن) کو مل جاتا تھا، انہوں نے کہا کہ تحریک انصاف کے چیئرمین عمران خان کی مقبولیت کم ہوتی جا رہی ہے، اگر اگلے چند مہینوں میں سابق وزیراعظم میاں محمد نواز شریف کی اہلیہ کلثوم نواز وزیر اعظم بن جاتی ہیں تو اس کا مطلب شاہد خاقان عباسی پر عدم اعتماد ہرگز نہیں ہوگا۔