اسلام آباد (مانیٹرنگ ڈیسک) ضمنی انتخاب میں سابق وزیراعظم میاں محمد نواز شریف کی اہلیہ کلثوم نواز کی جیت کے بعد تحریک انصاف کے چیئرمین عمران خان شدید ذہنی کرب کا شکار ہیں۔ تحریک انصاف کے چیئرمین کو مسلم لیگ (ن) کی جیت انہیں پریشان کر رہی ہے،

عمران خان تحریک انصاف کی لاہور قیادت پر بھی غصے میں ہیں، لاہور کی قیادت کو یہاں تک کہہ دیا کہ آپ لوگوں سے کچھ نہیں ہو سکتا، ضمنی انتخاب میں آپ مسلم لیگ (ن) کو شکست نہیں دے سکے حتیٰ کہ نیب اور سپریم کورٹ بھی ان کے خلاف کارروائی کر رہا ہے اس کے باوجود آپ لوگ ان سے حلقہ این اے 120 میں ہار گئے تو آئندہ الیکشن 2018 میں آپ کیسے مسلم لیگ (ن) کا مقابلہ کر سکیں گے جب یہ ساری باتیں لوگوں کو بھول چکی ہوں گی اور مسلم لیگ (ن) اپنی پوری طاقت کے ساتھ الیکشن لڑے گی۔ تحریک انصاف کے چیئرمین عمران خان اس لیے بھی زیادہ پریشان ہیں کہ انہوں نے مریم نواز پر انتخابی مہم کے دوران بہت زیادہ تنقید کی لیکن اس کے باوجود حلقہ این اے 120 میں جیت ن لیگ کی ہوئی، جس کی وجہ مریم نواز کی جانب سے چلائی گئی بہترین انتخابی مہم ہے۔ عمران خان کو اس شکست کے بعد پورا لاہور ہاتھ سے نکلتا ہوا نظر آ رہا ہے اور اسی وجہ سے عمران خان تحریک انصاف لاہور کی قیادت سے اس بارے میں خفا ہیں اور عمران خان نے ان کی سیاسی پالیسیوں اور انتخابی مہم کو آڑے ہاتھوں لیا ہے۔