اسلام آباد(آئی این پی)وزیر مملکت برائے کیڈ ڈاکٹر طارق فضل چوہدری نے کہا ہے کہ پرائیویٹ سکولوں کی طرف سے ماہانہ ٹیوشن فیس میں کئے گئے غیر قانونی اضافے کا معاملہ عدالت میں ہے، جلد عدالت سے فیصلہ ہونے کی امید ہے، قواعد میں جہاں ضرورت ہوئی ترمیم کی جائے گی۔ جمعہ کو ایوان بالا میں سینیٹر طاہر حسین مشہدی کے توجہ مبذول نوٹس کے جواب میں وزیر کیڈ طارق فضل چوہدری نے بتایا کہ پرائیویٹ سکولوں کو ریگولیٹ کرنے کے لئے پارلیمان نے 2013ء میں ایکٹ پاس کیا، پیرا نے 2016ء میں فیسوں کو ریگولیٹ کرنے کے لئے قانون بنائے، اس کے خلاف پرائیویٹ سکولز عدالت میں چلے گئے۔ سپریم کورٹ کے احکامات پر اکتوبر 2017ء تک عدالت سے کیس کا فیصلہ ہو جانے کی امید ہے، ہم والدین اور تعلیمی اداروں کے خدشات کو مدنظر رکھیں گے اور قواعد میں جہاں ضرورت ہوئی ترمیم کریں گے۔ قبل ازیں سینیٹر طاہر حسین مشہدی نے وفاقی دارالحکومت میں نجی سکولوں کی جانب سے ماہانہ ٹیوشن فیس میں کئے گئے غیر قانونی اضافے کی جانب وزیر برائے کیپیٹل ایڈمنسٹریشن اینڈ ڈویلپمنٹ کی توجہ مبذول کرائی۔ ‎

موضوعات:وزیر کیڈ