اسلام آباد (مانیٹرنگ ڈیسک) سی پیک کے حوالے سے سابق وزیر اعظم نواز شریف کی نا اہلی کے بعد مختلف خدشات کا اظہار کیا جا رہا ہے، تفصیلات کے مطابق جہاں سی پیک کے بارے ملکی سطح پر خدشات کا اظہار کیا جار ہا ہے وہیں بین الاقوامی میڈیا پر بھی اس موضوع پر تبصرے شائع اور نشر کیے جا رہے ہیں، ایسے حالات میں چینی میڈیا نے بھی اپنے خدشات کا اظہار کیا ہے۔ چین کے اخبار ’’گلوبل ٹائمز‘‘ نے سابق وزیراعظم میاں محمد نواز شریف کی نا اہلی پر ایک آرٹیکل شائع کیا ہے

اس آرٹیکل میں کہا گیا ہے کہ میاں محمد نواز شریف کی نا اہلی کے بعد سی پیک منصوبے پر غیر یقینی صورت حال پیدا ہو سکتی ہے۔ چینی اخبار میں شائع کیے گئے آرٹیکل میں کہا گیا ہے کہ پاکستان کی کوئی بھی سیاسی جماعت چین مخالف جذبات کو اپنے سیاسی مقاصد کے لیے استعمال نہیں کرتی، پاکستان کے تمام سیاست دان چین کے ساتھ دوستانہ اور بہتر تعلقات کے حامی ہیں اور اس کو فروغ دینے کے نظریات رکھتے ہیں لیکن سی پیک کے حوالے سے پاکستان کی سیاسی جماعتیں تقسیم نظر آتی ہیں، واضح رہے کہ سی پیک کے دو روٹس ہیں جن میں سے ایک روٹ ’’مشرقی‘‘ جبکہ دوسرا ’’مغربی‘‘ ہے۔ سی پیک کا مشرقی روٹ پنجاب اور سندھ سے گزرتا ہے اور زیادہ فائدہ انہی دو صوبوں کا ہے دوسری طرف مغربی روٹ بلوچستان اور خیبرپختونخوا سے گزرے گا۔ پاکستان کے بعض سیاست دان مشرقی روٹ جبکہ بعض مغربی روٹ کے حامی ہیں۔ سابق وزیراعظم میاں محمد نواز شریف سی پیک کے مشرقی روٹ کے حامی ہیں جبکہ ان کے مقابلے میں اپوزیشن جماعتیں مغربی روٹ کو فوقیت دیتی ہیں۔ سابق وزیراعظم میاں محمد نواز شریف کی نا اہلی کے بعد اگر مسلم لیگ(ن) 2018ء کے انتخابات میں کامیاب نہ ہو سکی تو سی پیک کے حوالے سے غیر یقینی صورت حال پیدا ہو سکتی ہے مگر اگلے انتخابات میں پاکستان پیپلز پارٹی اور مسلم لیگ (ن) جیت جاتی ہیں تو سی پیک کے حوالے سے پیدا ہونے والے خدشات ختم ہوجائیں گے کیوں کہ دونوں پارٹیاں سندھ اور پنجاب کی جماعتیں ہیں اور وہ مشرقی روٹ کی ہی حامی ہیں لیکن اگر تحریک انصاف انتخابات جیت جاتی ہے تو وہ مغربی روٹ کو فوقیت دے گی جس سے سی پیک منصوبے کو نقصان پہنچ سکتا ہے۔