اسلام آباد (نیوز ڈیسک) وزیراعظم کے مشیر برائے خارجہ امور سرتاج عزیز نے کہا ہے کہ پاکستان ہمسائیوں سمیت تمام ممالک کے ساتھ پر امن اور خوشگوار تعلقات برقر اررکھنے کی خارجہ پالیسی پر عمل پیرا ہے ٗ چاہتے ہیں ایران اور سعودی عرب کے درمیان کشیدگی ختم ہو ٗضرب عضب آپریشن کے باعث دہشت گردی میں 60 سے 70 فیصد کمی آئی ہے ٗدہشتگردی کا خاتمہ کر کے ہی دم لینگے ۔ ایک انٹرویو میں مشیر خارجہ نے کہا کہ ملک سے دہشت گردی اور شدت پسندی کے خاتمہ کیلئے آپریشن ضرب عضب اور نیشنل ایکشن پلان سے کامیابیاں ملی ہیں۔ ایک سوال کے جواب میں انہوں نے کہا کہ پاک فوج ملکی سرحدوں کے تحفظ کی بھرپور صلاحیت رکھتی ہے ٗحکومت پڑوسیوں سمیت تمام ملکوں کے ساتھ پرامن اور خوشگوار تعلقات برقرار رکھنے کی خارجہ پالیسی پر عمل پیرا ہے۔ سرتاج عزیز نے کہا کہ پوری قوم متحد اور حکومت کی پالیسی صحیح سمت گامزن ہے۔ ایک اور سوال کے جواب میں انہوں نے کہاکہ چاہتے ہیں ایران اور سعودی عرب کے درمیان کشیدگی کم ہو ۔ایک اور سوال کے جواب میں انہوں نے کہاکہ ملک میں کسی معاشی عدم استحکام کا کوئی خطرہ نہیں ہے۔